പച്ചക്കറികള്‍ ആരോഗ്യകരമായ ഭക്ഷണത്തിന്റെ പ്രധാന ഭാഗമാണ്. സാലഡായും പച്ചയ്ക്കും പാകം ചെയ്തും ഒക്കെ ഇവ ദിവസവും ഭക്ഷണത്തില്‍ ഉള്‍പ്പെടുത്തുന്നവരാണ് നമ്മളില്‍ പലരും. എന്നാല്‍ എല്ലാ പച്ചക്കറികളും പാകം ചെയ്യാതെ കഴിക്കുന്നത് ഒരുപോലെ ഗുണകരമാകണമെന്നില്ല. പോഷകങ്ങള്‍ ലഭിക്കാനായി പച്ചക്കറികള്‍ പച്ചയ്ക്ക് കഴിക്കുന്ന ശീലം ഇന്ന് വര്‍ധിച്ചുവരുന്നുണ്ട്. പാചകം ചെയ്യുമ്പോള്‍ ചില പോഷകങ്ങള്‍ കുറയാമെങ്കിലും വേവിക്കുന്നത് ചില ഘടകങ്ങളുടെ ലഭ്യത വര്‍ധിപ്പിക്കാനും ഭക്ഷണം സുരക്ഷിതമാക്കാനും സഹായിച്ചേക്കാം. അതിനാല്‍ പച്ചക്കറികള്‍ എങ്ങനെ കഴിക്കുന്നു എന്നതും പ്രധാനമാണ്. എന്നാല്‍ ചില പച്ചക്കറികള്‍ പച്ചയ്ക്ക് കഴിക്കുന്നത് ഗുണകരമല്ല. അവ ഏതൊക്കെയാണെന്ന് നോക്കാം.
ഇരുമ്പും മറ്റ് പോഷകങ്ങളും അടങ്ങിയ ചീര പലരുടെയും ഭക്ഷണക്രമത്തില്‍ സ്ഥിരമായി ഇടംപിടിക്കുന്ന ഒന്നാണ്. എന്നാല്‍ ചീരയില്‍ സ്വാഭാവികമായി അടങ്ങിയിരിക്കുന്ന ഓക്‌സലേറ്റുകള്‍ ചില ധാതുക്കളുടെ ആഗിരണത്തെ ബാധിച്ചേക്കാം. വൃക്കയില്‍ കല്ലുണ്ടാകാനുള്ള സാധ്യതയുള്ളവര്‍ക്ക് ഓക്‌സലേറ്റിന്റെ അളവ് പ്രത്യേകം ശ്രദ്ധിക്കേണ്ടിവരും. ചീര നന്നായി പാകം ചെയ്യുന്നത് ഓക്‌സലേറ്റിന്റെ അളവ് കുറയ്ക്കാന്‍ സഹായിച്ചേക്കാം. അതേസമയം പച്ച ചീരയില്‍ മണ്ണില്‍ നിന്നോ മലിനമായ വെള്ളത്തില്‍ നിന്നോ രോഗാണുക്കള്‍ എത്താനുള്ള സാധ്യതയുമുണ്ട്. അതിനാല്‍ ഇലകള്‍ വൃത്തിയായി കഴുകുകയും ആവശ്യത്തിന് പാകം ചെയ്ത് കഴിക്കുകയും ചെയ്യുന്നത് നല്ല ശീലമാണ്.
സാലഡുകളില്‍ സാധാരണയായി ഉപയോഗിക്കുന്ന പച്ചക്കറിയാണ് കാബേജ്. നാരുകളും മറ്റ് പോഷകങ്ങളും അടങ്ങിയ ഇത് ഭക്ഷണത്തില്‍ ഉള്‍പ്പെടുത്തുന്നത് നല്ലതാണ്. എന്നാല്‍ വൃത്തിയാക്കുന്നതിലും കൈകാര്യം ചെയ്യുന്നതിലും വീഴ്ചയുണ്ടായാല്‍ രോഗാണുക്കള്‍ ഭക്ഷണത്തിലൂടെ ശരീരത്തിലെത്താന്‍ സാധ്യതയുണ്ട്. കാബേജ് പച്ചയ്ക്ക് കഴിക്കുമ്പോള്‍ പുറംഭാഗത്തെ ഇലകള്‍ നീക്കി നന്നായി കഴുകണം. സംശയാസ്പദമായതോ കേടായതോ ആയ ഭാഗങ്ങള്‍ ഒഴിവാക്കുകയും വേണം. കൂടുതല്‍ സുരക്ഷിതത്വം ഉറപ്പാക്കാന്‍ കാബേജ് നന്നായി പാകം ചെയ്ത് കഴിക്കാം. കാബേജ് കഴിക്കുന്നതുകൊണ്ടുമാത്രം ഗുരുതരമായ രോഗങ്ങള്‍ ഉണ്ടാകുമെന്ന് കരുതേണ്ടതില്ല. ഭക്ഷ്യവസ്തുക്കളുടെ ശുചിത്വവും സുരക്ഷിതമായ പാചകരീതിയുമാണ് ഇവിടെ പ്രധാനം.
തോരനായും കറിയായും വറുത്തുമെല്ലാം മലയാളികളുടെ ഭക്ഷണത്തില്‍ ഇടംപിടിക്കുന്ന പച്ചക്കറിയാണ് വഴുതനങ്ങ. എന്നാല്‍ വഴുതനങ്ങ പച്ചയ്ക്ക് കഴിക്കുന്നതിനേക്കാള്‍ നന്നായി പാകം ചെയ്ത് കഴിക്കുന്നതാണ് ഉചിതം. വഴുതനങ്ങ ഉള്‍പ്പെടുന്ന നൈറ്റ്ഷെയ്ഡ് വിഭാഗത്തിലെ സസ്യങ്ങളില്‍ സോളനൈന്‍ പോലുള്ള ഗ്ലൈക്കോആല്‍ക്കലോയിഡുകളെക്കുറിച്ച് ആശങ്കകള്‍ ഉയരാറുണ്ട്. എന്നാല്‍ വഴുതനങ്ങയില്‍ സോളനൈന്‍ അപകടകരമായ അളവില്‍ ഉണ്ടെന്ന് പൊതുവായി പറയാനാവില്ല. സാധാരണയായി ലഭിക്കുന്ന വഴുതനങ്ങ ശരിയായ രീതിയില്‍ പാകം ചെയ്ത് കഴിക്കുകയാണ് വേണ്ടത്. കേടായതോ അസാധാരണമായ രുചിയോ രൂപമാറ്റമോ ഉള്ളതോ ആയ വഴുതനങ്ങ ഉപയോഗിക്കാതിരിക്കുന്നതും പ്രധാനമാണ്.
വൃക്കയില്‍ കല്ലുണ്ടാകാനുള്ള പ്രവണതയോ മറ്റ് ആരോഗ്യപ്രശ്‌നങ്ങളോ ഉള്ളവര്‍ ഭക്ഷണക്രമത്തില്‍ ആവശ്യമായ മാറ്റങ്ങള്‍ ഡോക്ടറുടെയോ ഡയറ്റീഷ്യന്റെയോ നിര്‍ദേശപ്രകാരം വരുത്തുക.
Content Highlights :How you consume vegetables is also important. However, eating some vegetables raw is not beneficial. Which ones are they?